港鐵鼠年紀念票 糅合中西風情

仲有唔夠一個月就到農曆新年，如果你有儲開生肖紀念車票，咁就唔好錯過港鐵推出嘅「限量版庚子鼠年紀念車票套裝」喇！

黛安收到港鐵公關姊妹通知，呢套咁有紀念價值嘅車票，將於星期日（1月5日）推出。呢套鼠年紀念車票嘅設計，糅合古今中外藝術家嘅畫作，展現唔同藝術風格。其中喺明宣宗筆下，靈鼠津津有味食荔枝一圖，寓意豐盛吉祥；而喺來自意大利北部嘅現代插畫家Giulia Pintus筆下嘅靈鼠，則顯得精靈可愛。每套車票套裝除咗有兩張紀念車票及1個精美票套，仲有8個「迎春接花」利市封，每套賣98元。市民憑票仲可以喺大年初一（1月25日）當日，無限次乘搭港鐵㖭！

此外，港鐵仲會喺同一日推出兩款「靈鼠對對配」雙層玻璃杯。當你倒飲品落去，就會見到有隻老鼠仔喺杯入面，非常可愛，每款售80元。兩項產品同步喺1月5日列車服務開始時，於各港鐵、輕鐵客務中心（非付費區）及網上公開發售，每人每次限購最多兩套，售完即止。網購可享額外折扣，詳請留意港鐵網頁啦！