愛協夥寵物生活用品店 拓一站式動物領養

「領養代替購買」動物，近年愈來愈普及，唔少組織都好積極推廣，黛安聽公關姊妹講，最近香港愛護動物協會聯同寵物生活用品店Whiskers N Paws，推出專門設立嘅小動物領養空間，提供一站式嘅體驗，等家庭、情侶同關注動物人士都可以領養小動物，兼培養公眾對照顧小動物嘅責任心同尊重生命嘅重要性。

黛安知道，WNP係全港首間集合寵物用品零售同領養動物服務嘅社區旗艦店，多年嚟一直致力同多個動物慈善團體合作，接收被遺棄嘅小動物，再進行領養配對，為小動物另覓居所。原來佢哋由2008年至今，已經幫助超過3,000隻貓狗另覓居所；而愛協單係舊年，4個領養中心亦合計成功幫助超過2,600隻動物被領養。

為咗進一步推廣「領養代替購買」小動物意識，提高小動物獲領養機會同宣揚人道教育，兩個組織最近宣布合作，即日起位於鴨脷洲新海怡廣場嘅Whiskers N Paws將正式啟用，公眾可到店內享用一站式嘅領養服務，務求以創新形式鼓勵大家救救毛孩！

愛協執行總監蔡寶兒同黛安分享，愛協即將步入100周年，希望啟發社會人士對生命有更深徹嘅尊重，令人類與動物能夠和諧共處，希望透過開設小動物領養空間，作為發展領養服務嘅重要一步。加上照顧兔仔、倉鼠等小動物嘅條件比照顧貓狗低，亦可以令家庭成員建立責任心，希望為大眾拓展更多支持領養嘅機會咁話！咁有意義，大家記住多多支持喇！

小動物領養空間

地址︰鴨脷洲利榮街2號鴨脷洲新海怡廣場10樓

營業時間︰10am-7pm

網址︰https://zh.wnp.com.hk