邪惡的豬油撈飯

以前的貧窮家庭，買唔起肉食做餸菜，就會買一些價格較便宜的肥豬肉炸油。豬油冷卻凝固後可長久儲存，吃時挑一細塊乳白色的豬油放入熱飯中溶化，加醬油撈飯，香口惹味，甚至連餸菜也不用。肥豬肉炸油後餘下的「豬油渣」，可作為其他餸菜的配料。

正如美食家蔡瀾曾寫過《死前必食》，列數全國美食，豬油撈飯入選其一。「在窮困的年月中，那碗工具是我們的山珍海味。」喺《豬油萬歲論》中，形容豬油的香味，是食過的人才懂。豬油撈飯其實好簡單，咪就係豬油加白飯，再加些醬油同蔥花，拌勻即可。

上星期我便約齊一班朋友，入沙田的酒店食北京填鴨，兼食堂弄玫瑰露叉燒配豬油撈飯。未食前，朋友都有投訴話地方唔就腳，嫌長途，問我係咪一定要坐咁遠車先食到？（我住香港的朋友好奇怪，佢哋就算自己揸車或有司機，都不大願意去九龍，佢哋話除非去機場坐飛機。有啲朋友甚至話去九龍，情願去一轉泰國或台灣。）

最終我話為咗豬油撈飯，係值得嘅！我發誓，如果你覺得唔好食，我幫你食埋你嗰砵飯！

結果︰這晚的高潮位就開始了！侍者、廚師都帶埋玫瑰露淋落去叉燒度，跟住熊熊聖火，玫瑰露酒的香味充斥成間房，叉燒除了可沾上玫瑰露酒的香味外，仲可以做到「燶邊」，食起上嚟更香口。仲有埋視覺、味覺和嗅覺嘅效果，好正！去到呢個境界，都未將高潮推盡。瞪瞪瞪登！拌得起呢啲邪惡玫瑰露叉燒嘅，就係有番咁上下邪惡嘅豬油撈飯，你可否諗到兜飯裏面夾雜咗帶有玫瑰露酒香味嘅叉燒油，再滲有豬油加甜醬油嘅一啖飯，喺口入面係乜嘢滋味？

答案係︰性感的滋味！因為我啲朋友食到反晒眼，個個look so sexy。誠意推介你嚟試嚇呢款邪惡組合，你就知我無作大！

（本欄逢周四刊登）