修繕成星巴克旗艦 恒隆保育天津百年建築

好多舊建築物都有歷史價值，黛安知道，早前恒隆集團將位於天津嘅原浙江興業銀行修繕重建，保育咗呢座近百年歷史建築，仲改建為星巴克臻選旗艦店，為建築物注入新生命！

聽公關姊妹講，浙江興業銀行曾被輾轉改造成裁縫店和電影拍攝場地，但因年代久遠，原建築已經損毀嚴重，施工團隊需要先清拆由前業主所加裝嘅非文物裝飾及擺設，然後逐一修補原有建築，包括地板、柱飾、牆身雕刻、屏風及窗花鐵藝等，仲將大樓內所有窗戶和玻璃換成雙層玻璃，可以喺冬季減少能源耗用，做到環保節能。

建築物修繕之後，加入現代商業經營理念，融合古今成為「恒隆廣場•天津」獨一無二嘅DNA，等大家可以一邊行街，一邊欣賞歷史建築，真係好有心思啊。