迪士尼「奇妙夢想城堡」暗藏各公主特色 明年完成擴建

香港迪士尼向來係唔少大人細路嘅夢幻樂園，最具標誌性嘅一定唔少得城堡啦，香港迪士尼樂園噚日公布，園內城堡擴建後，將正式命名為「奇妙夢想城堡」，華麗變身後嘅城堡，預計喺2020年登場喇！

黛安知道，香港迪士尼城堡建築設計嘅靈感，係嚟自多個經典迪士尼公主故事，所以變身後嘅城堡將向呢啲迪士尼公主致敬，包括喺每一個獨特嘅塔樓同尖頂之中，會透過顏色、標誌圖案、紋理、裝飾等，令人輕易聯想到所象徵嘅迪士尼公主故事。

預計明年登場嘅城堡，象徵勇氣、希望和無盡可能，標誌永不放棄追求夢想嘅決心。城堡開幕後，亦會增設全新嘅夜間同日間精采表演節目，詳情稍後公布。

除咗城堡之外，樂園新階段擴建計劃另一個重要項目，就係以賣座動畫「魔雪奇緣」為主題嘅全新園區，將會有「雪嶺滑雪橇」同「魔雪奇幻之旅」新設施，將成為全球第一個以「魔雪奇緣」為主題嘅迪士尼園區，而且喺2021年就會推出，咁多新元素，黛安都好期待啊！