浸大新宿舍邀捐款命名房間 「樓神」趙國雄出錢出力撑母校

黛安每次見到姊妹們熱心同積極支持佢哋母校嘅活動，都感受到佢哋對母校嘅熱愛同情懷。日前黛安出席咗浸會大學校友事務處舉行嘅籌款活動，聽浸大校友事務處總監李惠儀（Melanie）介紹，浸大新宿舍「CARE舍堂村」會喺2023/2024年度落成，學校今次特別撥咗小量特選房間，邀請校友同社會人士捐款命名，所得善款會用嚟資助弱勢學生，希望佢哋唔會因經濟問題而局限發展。

計劃咁有意思，作為浸大傑出校友、人稱「樓神」嘅長實執行董事趙國雄第一個出嚟支持。黛安聽Melanie講，樓神除咗率先響應認投咗4間房嘅命名權，更化身代言人替校友事務處拍攝宣傳片。黛安覺得段片拍得好好，其中樓神喺片段提到自己50年出生，父母受教育唔多，所以佢自細就好努力讀書，希望可以出人頭地，後來考入當時嘅浸會學院修讀社會學，雖然佢已經畢業多年，但佢依然覺得喺浸大讀書嗰兩年獲得好多嘅機會，所以到現時自己有能力，都希望可以回饋母校。

Melanie仲同黛安講，計劃籌得嘅款項主要資助3類學生︰包括父母從未接受過大專或以上教育嘅大學生、少數族裔，以及有特殊學習需要嘅學生。如果大家都想支持呢個咁有意義嘅計劃，可以捐出20萬元（單人房）或30萬元（雙人房），就可以取得宿舍房嘅命名權，同時幫有需要嘅學生拓展視野。

樓神建議，大家不妨考慮聯同其他校友合供一間房，支持師弟妹學習，計劃仲接受分期付款，呢個建議的確唔錯。黛安都祝願計劃成功，希望可以籌多啲錢，令更多學生受惠。