迪士尼城堡華麗變身 13個公主城塔夏日登場

迪士尼咁多個公主，唔知大家最鍾意邊個呢？黛安聽公關姊妹講，香港迪士尼全新面貌嘅「城堡」，將進入華麗變身過程中最重要嘅階段，佢嘅設計靈感係嚟自深受大家喜愛嘅13個迪士尼公主故事，包括茉莉公主、白雪公主、《魔雪奇緣》的安娜同愛莎等，而象徵住呢班公主故事嘅城塔，就會喺今個夏天逐一亮相啊！

完成華麗變身後嘅「城堡」象徵勇氣、希望同無盡可能，標誌住永不放棄追求夢想嘅決心，就好似迪士尼公主咁。公關姊妹話，各個建築設計特色、盡顯獨特工藝嘅城塔、塔樓同尖塔，將會陸續出現喺城堡上。例如城塔喺設計上有唔同嘅細節，好似標誌圖案、紋理、顏色同裝飾咁，都可以令人聯想到所象徵嘅迪士尼公主故事，所有地方都係非常用心設計㗎。

黛安知道，全新嘅「童話藝坊－魔法化粧廳」已經喺城堡區隆重開幕，魔法化粧廳嘅裝潢盡顯皇室氣派，行入去就好似踏上皇室嘅奇妙之旅，令人覺得自己好似變咗一個高貴動人嘅小公主咁。

另外，香港迪士尼樂園酒店亦會推出全新國賓廳《仙杜瑞拉》主題套房，室內布置都好有主題特色，令人覺得灰姑娘嘅童話故事會成真！另一個驚喜，就係樂園商店由即日起直至今年12月，每個月都會推出兩款全新迪士尼公主徽章，獨一無二嘅限量設計，代表咗13個有關迪士尼公主嘅故事。大家仲唔快啲嚟樂園收藏自己鍾意嘅公主徽章？黛安都約好班姊妹入樂園玩喇！