認住全新星級制度 「有營食肆」衞你飲食健康

近年港人開始注重健康，食當然都要食得「有營」！黛安知道，衞生署最近新推出「星級有營食肆」運動，為推出咗超過10年嘅「有營食肆」計劃，新增1星、2星、3星等星級制度，鼓勵更多食肆提供多元化嘅健康菜式。現有有營菜式好似墨西哥脆片、法式洋蔥湯、金菇仿螺片扒西蘭花等，中西風格一應俱全，滋味不失，啱晒追求健康，兼想食好嘢嘅大家！

黛安知道，全新嘅「星級有營食肆」運動噚日正式舉行開幕禮，宣布優化推出咗超過10年嘅「有營食肆」計劃，當中包括引入星級制度，好似有綠星嘅食肆，將會每日提供以蔬果為主嘅「蔬果之選」菜式；有紅星嘅食肆則每日提供「蔬果之選」同含較少油鹽糖嘅「3少之選」菜式；而有黃星嘅食肆更會每日為「蔬果之選」或「3少之選」嘅菜式提供各式各樣嘅「有營優惠」。

如果可以一次過攞晒全部綠、紅、黃星嘅食肆，就會成為最高級別嘅3星「有營食肆」啦！目前已經有280個品牌，共1,028間食肆加入運動，當中近半都係3星「有營食肆」。望到每間食肆嘅唔同「星星」，大家自然更識選擇。

而當中唔少餐廳都中西風格兼備，好似金記冰室6款嘅「蔬果之選」，就有清炒時蔬、欖菜肉碎四季豆等住家廣東菜；廣發餐廳仲有金菇仿螺片扒西蘭花、蘋果鮮雜菜粒炒飯等創意菜式。西餐廳就有LCB Express做代表，分別有特色墨西哥脆片、法式洋蔥湯等西式美食，仲有拌有機野菌五穀飯呢個「3少之選」，滋味又健康。

衞生署署長陳漢儀醫生就分享，「有營食肆」運動自2008年推行至今，為市民外出用膳時帶來更多健康選擇，希望借今次全新「星級有營食肆」嘅星級制度，吸引更多食肆加入，為市民提供更多元化菜式，同時加入優惠元素，等大家出去食嘢時可以用優惠價錢享受既美味又健康嘅菜式。黛安下次吃飯都要留意多啲先！