教育局局長下廚 三道菜見證教育界大事

教育局局長楊潤雄（Kevin）、副局長蔡若蓮同政治助理施俊輝（Jeff）噚日喺國際廚藝學院同一眾傳媒好友飯聚，講講過去一年工作；三位仲親自下廚，各自炮製一道菜式。

黛安都有份出席，仲試過呢三道菜，原來背後仲有寓意！分別代表去年一件教育界事件，好似「山竹蜂蜜特飲」代表舊年風災畀學校嘅特別津貼；「芝士甜柑沙律」就代表注資大學研究基金；至於「露絲瑪莉香草蜆殼燴全蛋麵」就代表中小學老師全面學位化，非常有意思，黛安都覺得佩服！

Kevin話，去年先後有高錕、饒宗頤、金庸等學術文化界巨人離去，係教育界大損失；但同時政府喺教育方面開支亦突破1千億，值得高興。佢又特別感謝教育界，過去一年同當局合作，特別喺風災同最近流感嘅應變方面，配合政府工作。