人無夢想同咸魚有乜嘢分別？雖然田蕊妮貴為視后，但原來唱歌先係佢嘅夢想，無奈其樂壇之路荊棘滿途，令阿田亦只能接受現實放棄追夢，直至母親不幸因癌病離世，令她再次憶起母親教誨──做人要勇敢追夢！令阿田再次重拾歌星夢，對於受亡母啟發才能勇敢豁出去，阿田忍不住哭成淚人自認不孝：「我當年講咗好多傷害阿媽嘅說話！」
接受現實放棄追夢
今年41歲的田蕊妮，原來發歌星夢已經發咗25年，當時只得16歲的她參加第四屆《未來偶像爭霸戰》歌唱比賽，憑關淑怡的《一首獨唱的歌》奪得金獎加入亞視，雖然阿田曾唱過1994年世界盃主題曲《熱燙的宇宙》，並收錄在新藝寶雜錦碟中，可惜其後未獲唱片公司垂青，只能一直拍劇。至2006年阿田轉投無綫，雖然獲得公司器重，一劇接一劇，先在劇集《鬼同你OT》精堪演技獲得觀眾支持，好評如潮，更於2013年憑《巨輪》登上視后寶座。拍劇就一帆風順，不過歌唱事業就認真麻麻，雖然曾獲Paco黃柏高賞識加盟太陽娛樂，更推出首張專輯《You Are My Man》，但之後由於要應付忙碌的拍劇工作，令阿田只好又再放棄追夢。
受亡母啟發堅持追夢
及至2016年，阿田的母親韓美枝因癌病逝世，令她大受打擊，同時亦憶起與亡母的種種點滴，反思人生：「我當年講咗好多傷害媽媽嘅說話，有段時間覺得利用金錢去滿足佢哋就足夠，冇真正去關心，甚至有時覺得佢哋好難溝通，但其實唔係父母問題，因為佢哋要求好簡單，只要令佢哋開心就最重要。」然而一切後悔已經太遲，幸而悲傷過後，阿田痛定思痛，想起亡母教她做人要勇敢追夢，千萬不能輕言放棄，令她又再路上歌手之路：「其中一首新歌紀念媽媽偉大，我睇歌詞已經爆喊，因為首歌係以女兒身份講媽媽，令我諗起我同媽媽。其實人生冇絕對啱同錯、好同壞，與其花時間同心力去糾結邊個先係正確選擇，點解唔大膽啲做決定，喺危機中成長，間唔中犯錯先係人生最精采嘅部份。我真係好享受企喺台上嘅每一刻，所以嚟緊會將重點發展唱歌事業。」
可能太耐無錄歌，又可能阿田太過緊張，在錄製新歌的過程中，，連身體都開始出現問題：「之前聲帶出現咗啲問題，停咗錄音一排，醫生話聲帶變厚，而且呢段時間天氣又凍，有細菌感染受損，不過我都會盡力唱好歌，依家只係想努力做好自己想做嘅事！我好想開音樂會，會好好練歌同籌備。」終於出新歌，阿田很著緊，而其中一首新歌《兩口子》的MV更由阿田親自執導，本來男主角是黎學勤，但結尾竟變成老公杜汶澤。原來她想憑歌寄意，公開向杜汶澤示愛：「每個人的配偶，也是自己眼中的男神」，追夢之餘又不忘老公，認真是好老婆。