近日由田蕊妮主持的TVB節目《女人四十》大獲好評，她以第一身講「中女」熱切關注的生理及心理難題，成功引起網民關注。阿田更在節目中參加極速約會，不過當工作人員問她會選哪一位男士時，她毫不猶疑回答：「杜汶澤！」雖然表面兩人甜蜜恩愛，但相識24年間，阿澤竟然惡行累累，唔止欠下數百萬賭債走佬，仲試過出軌偷食，就算妳再深愛呢個男人，都真係幾難頂得順，難怪阿田都話最灰嗰陣：「有諗過離開佢！」
(myTV SUPER截圖)
阿田默默守護 杜汶澤惡行累累
田蕊妮與杜汶澤同樣是亞視出身，但當阿田跟陳煒、萬綺雯、張文慈齊名，獲外界封為亞視四大花旦之際；當時杜汶澤只是在亞視仍只是飾演大配角，甚至染上賭癮輸掉數百萬元，要連夜逃往台灣避債，誰知又被「大耳窿」打去報館追數爆料，人生污點頓時變成首個娛樂頭條，但阿田仍無視身份地位差距戀上阿澤。面對如此災難，阿田一度想放棄：「嗰陣有諗過離開佢，但嗰陣佢經歷大起大落，如果嗰陣真係離開佢是對佢造成好大打擊，所以最後打消咗呢個念頭。」而阿田真係講得出做得到，同阿澤一齊努力賺錢還債。
成功度過難關後，兩人於2005年牽手步入教堂，阿田更於翌年轉投TVB，成功踏上視后之路。誰知事業得意卻愛情失意，二人磨擦愈來愈多，阿田發現老公有小三：「我見佢同個女人玩WhatsApp，我知道邊個係小三，當時想逃避唔去面對，個人好迷失冇晒重心，唔知點處理夫妻之間嘅關係。」其實又難怪阿田唔識面對，原來早在拍拖嗰陣，阿田已經試過捉姦在床，但佢都係選擇了原諒。
(田蕊妮facebook)
選擇放下 感情不變
或者是上天對阿澤的懲罰，其事業突然急轉直下，身邊朋友一個個離開，令阿田又再一次心軟：「佢點對我唔重要，最重要點對自己，萬一佢車住條女俾人影到，有冇諗過自己玩完？所以最心痛唔係有個女人出現，而係如果嗰時我走咗去，真係好冇義氣。我好重視呢個人、好愛佢先嫁俾佢，我亦知佢仲好愛我，佢嗰陣乜都冇晒，咪同自己講等佢好返少少先走。」正所謂禍不單行，雖然有阿田默默陪伴，但杜汶澤竟確診患上罕見的米勒費雪症候群，嚴重的話，會令四肢癱瘓、甚至窒息致死。眼見至愛隨時面臨死神，以往再多的過失，阿田不單全都拋諸腦後，更自責因為工作未能照顧老公：「當佢病嗰陣，唔能夠喺佢身邊，仲反而要佢安慰我，喺佢身上，我學到好多，杜生係我心目中嘅巨人！」完成拍攝工作後，阿田即趕返香港日夜在醫院照顧杜汶澤，兩年後終在悉心照料下痊癒。
多年來阿田陪老公走過一段段人生低潮，又經歷債務風波、又怪病纏身，再加上出軌背叛，難怪阿澤都話欠老婆嘅嘢，一世都還唔晒。或者好多人會覺得田蕊妮好天真、好傻，但問世間情是何物，能覓得一個自己甘願赴湯蹈火的人，是傻還是幸福，相信只有阿田自己才能下答案。
(田蕊妮instagram)
(田蕊妮instagram)
(田蕊妮instagram)
(田蕊妮instagram)