港10歲女棋手 奪國際象棋候選大師頭銜

幾時都話香港啲小朋友才華洋溢，最近又有新嘅例子喇！黛安知道，現年僅10歲嘅香港小朋友李在晴（Joy），早前代表香港隊參加遠在格魯吉亞（Georgia）舉行嘅「第四十三屆世界國際象棋奧林匹克」（Chess Olympiad）比賽時，勇奪由國際棋聯頒發嘅「女子候選大師」（WCM）頭銜，成為全港最年輕奪得此榮銜嘅女棋手，果然前途無限可量！

黛安知道，Joy現就讀於九龍真光中學（小學部）五年級，年紀小小，但今年9月已經有機會代表香港隊，遠赴格魯吉亞參加「第四十三屆世界國際象棋奧林匹克」比賽，同嚟自全球180多個國家同地區嘅選手一較高下，最終經歷14天共11輪嘅長時間比賽，以9局5勝嘅佳績，勇奪國際棋聯頒發嘅WCM頭銜。

黛安收到消息，直到幾日前，國際棋聯終確認相關資格，Joy正式成為全港最年輕奪得呢個榮銜嘅女棋手，為港爭光，好勁啊！

唔講唔知，國際棋聯嘅頭銜分開男女，主要分為特級大師、國際大師、棋聯大師同候選大師4個，而拎到呢啲榮譽亦絕對唔簡單，好似目前香港國際象棋棋手當中，就只有23人擁有由國際棋聯頒發頭銜嘅榮譽，當中女棋手更只有7名，Joy就係其中一個，真係前途無限！