創新科技嘉年華 VTC智慧發明聯繫生活

依家認真唔好睇小一班年輕人嘅創新頭腦，聽公關姊妹講，職業訓練局（VTC）下個月會參加創新科技署舉辦嘅「創新科技嘉年華2018」，當中會展出好多師生共同研發嘅作品，全部都同生活息息相關。

今次嘉年華嘅主題係「創科生活‧智慧未來」，其中由IVE遊戲及動畫高級文憑畢業生設計嘅「外星之眼」虛擬實境（VR）教育遊戲，玩家首先戴上VR眼鏡，遊戲開始後，就會出現文學、詞彙同修辭等中文題目，只要用道具武器「攻擊」虛擬世界入面代表唔同答案嘅「小妖怪」，中咗就會有分，真係寓學習於娛樂啊。

另外，現代人生活壓力大，好多人都有睡眠問題。IVE智能手機軟件開發高級文憑畢業生，就研發咗「Sleeping Monitor」手機App，系統會分析用家睡眠期間嘅腦電波，按唔同情況自動播放適合音頻，好似音樂、故事、演講等，好專業咁氹你瞓覺。

想親身體驗咁有趣嘅產品，大家可以喺下月嘅3至11日，去到香港科學園同一班研發者一齊切磋！咁有趣，記得唔好錯過呀！