海洋公園 x Sanrio 哈囉喂餐飲「驚慄」登場

海洋公園「哈囉喂全日祭2018」又嚟啦！除咗有嚇破膽嘅鬼屋之外，下月19號至11月4號仲會推出一系列「驚慄」同「至萌」主題餐飲，包括同Sanrio嘅聯乘餐單，最萌嘅一定係Hello Kitty哈囉喂爆谷套裝，記得帶住佢一齊探險啦！

每年海洋公園為哈囉喂準備嘅大餐，像真度都非常高，簡直係地獄賣相，天堂味道。聽公關姊妹講，今次特別將「海洋冰室」化身急症室，獨家推出「急診哈囉『胃』」哈囉喂全日祭套餐，個個都變急症室醫生大施「手術」，將逼真恐怖嘅斷肢同五花八門手術道具、藥水一一送入口！好似「天殘掌」（煙肉燒雞卷）或者「幽靈鬼手」（焗鮮茄雜菜釀燒烤菇），再配上用環保海鮮澳洲龍蝦同加拿大帶子烹調嘅「新鮮腦漿」，細膽啲都唔敢食啊！

而最萌嘅一定係「冰極餐廳」首度被一班Sanrio主角佔領，化身南瓜伯爵造型嘅Hello Kitty，會同其他共7位好朋友，包括布甸狗、Little Twin Stars、梳乎蛋等，一齊係餐廳等大家嚟試「Sanrio characters哈囉喂全日祭套餐」四道菜式全日祭套餐！

如果中意方便，公園都仲有單點美食、派對便當同便攜輕食，包括「魔鬼安格斯牛芝堡」、「一級地獄筍盤」、「地獄油鑊旋風薯」、「邪惡燒雞髀」、特飲「血色吸睛」等。黛安最期待嘅就係獨家限量版「Hello Kitty哈囉喂爆谷套裝」，揹住Hello Kitty走圍玩，每個賣178元，一定要入番一手啊！