詠藜園義賣月餅 扶助老弱殘障

下月尾就係中秋節喇，又係食月餅嘅時節，有無諗過食月餅之餘都可以做善事？黛安知道今年老字號詠藜園會繼續舉辦慈善月餅義賣。義賣活動由2012年開始，6年來已有好多慈善團體受惠，籌得善款累積超過400萬元。今年賣月餅嘅收入扣除材料費後，80%將捐畀3間受惠機構，幫助有需要嘅人。

黛安噚日出席咗慈善月餅義賣嘅飯局，詠藜園老闆楊王小玲就同黛安講，搞咗咁多年月餅義賣，眨下眼就到咗第7年，今年除咗捐款畀固定受惠機構包括榕光社同失明人士互聯會外，仲會捐款畀再生會，楊太話希望透過義賣可以幫到無依無靠嘅長者「走都走得有尊嚴」，真係愛心爆棚呀！

第7年舉辦 80%款項捐3機構

受惠機構之一嘅香港失明人士互聯會主席鄧光寶就話，機構主要幫助失明同埋獨居長者進行家居維修，同埋訓練後天失明者行路等工作。再生會主席周榮富就話，會將善款用喺宣傳健康信息講座同埋提供社區情緒支援服務，幫助情緒受困擾嘅人。榕光社創會人林桂霞就話，善款將用喺資助有經濟需要嘅長者，包括支援中醫進行癌症義診服務。

作為詠藜園愛心大使嘅車淑梅，就同黛安推介今次4款御膳秘方慈善月餅，口味包括紅棗核桃月餅、海藻糖白蓮蓉榛子月餅、黑芝麻核桃月餅同埋八星報喜八仁月餅（純果仁），環保袋裝月餅賣78元、華麗單盒裝禮盒月餅賣148元，而華麗雙盒裝月餅就賣268元。身兼行會成員嘅自由黨主席張宇人都有出席支持活動，佢就話黑芝麻口味啱晒佢，所以最鍾意食黑芝麻核桃月餅！如果大家想過一個有意義嘅中秋，記得支持呢個月餅義賣活動喇！