郭錦記 長洲太平清醮 推Hello Kitty平安包

話咁快下個月就係一年一度嘅長洲太平清醮，黛安每年都會去湊熱鬧，食下平安包，睇下飄色巡遊。聽講今年更有新搞作，元袓級餅店郭錦記會推出3款同Sanrio明星家族crossover嘅平安包，仲有宇治金時、香芋同蓮蓉口味，聽到都覺得吸引！

太平清醮喺下個月18至22號舉行，啱晒一家大細去現場感受熱鬧氣氛，過番個愉快嘅周末！公關姐妹話，全新口味嘅平安包，係由郭錦記第二代傳人郭宇鈿精心炮製，真係青出於藍啊！保留住傳統味道之外，更加入年輕人鍾意嘅Sanrio明星家族，包括Hello Kitty、蛋黃哥同布甸狗，新口味仲有宇治金時、香芋同蓮蓉味。講起都想食啊，最愛綠茶嘅黛安，一定會試宇治金時口味。如果想送禮，仲有4件裝禮盒供應，都係賣$88，好意頭啊！

姐妹又話，今年郭錦記仲同生活優惠平台Getso合作，只要買一盒禮盒，就可以喺Getso app換領Häagen-Dazs TM雙球雪糕買一送一優惠劵1張，有效期為5月18至31日，數量有限，送完就無啦！