$1夾龍蝦 $10食吉品鮑 美食節倒數掃筍貨

一連4日聖誕假期啱啱結束，唔知大家去咗邊度玩呢？灣仔會展嘅冬季購物節今日係最後一日喇，未去嘅朋友要快啲去掃貨啦。冬日美食節聽日完結，黛安噚日就同朋友去咗，現場氣氛非常熱鬧！有參展商同黛安講，今年市民使錢普遍鬆手咗，佢哋都準備最後一日、或最後幾個鐘進行大劈價，同大家開開心心迎接新一年。

一句「你個嘢壞咗呀」就令參展商Prime Food嘅一蚊任夾龍蝦，成為每年美食節焦點，黛安噚日同負責人陳永聯傾過，原來佢哋每日送出50幾隻龍蝦，以每日限10位參加者嚟講，即平均一個人夾到多過5隻！陳永聯話，今年美食節營業額比往年多咗1成至1成半，市民較願意消費，加上港人對飲食要求提高，進口貨就啱晒佢哋口味。佢希望聽日最後一日會多啲市民嚟執平貨，兼且預告聽日最後幾小時會大劈價，「特價畀多啲客試到產品，當係聖誕節開開心心送出去！」光大參茸海味就推10蚊試食吉品鮑，參展商同黛安傾開，話10蚊一隻係蝕錢，但可以吸引客人試食，氣氛又開心啲，最後呢兩日可能會推出買鮑魚送冬菇，聽日會大劈價，等大家開心辦年貨。

黛安見到一對情侶拖住兩大車戰利品，原來邱小姐同男友買咗2,000蚊嘢！包括和牛、刺身蝦，仲有汽車用品，大讚新貨多，又比市面平，黛安聽完都想掃埋一份！