數碼通推動創新 助港轉型Smart City

Smart City成為新話題，黛安都多咗留意。噚日去數碼通嘅Innovation Hub參觀，睇到好多AI、AR等資訊及通訊科技（ICT），數碼通總裁葉安娜（Anna）同黛安講，要推動香港數碼轉型，一定要跨業界合作。

每次聽到AI、AR都覺得好高科技，Anna就解釋，其實科技同生活息息相關。黛安都留意到今次有展示智能泊車、物流同資產追蹤等科技。又例如物業管理，以前一棟大廈漏水，管理員要揾好耐先知源頭，而家只要安裝無綫感應器連接手機，一旦發生問題就會收到短訊通知，時間、地點、發生咩事，都輕鬆掌握。Anna仲話，數碼通以前講求快（Speed）、穩（Stability）、順（Seamlessness），依家會加埋安心（Security）和貼心（Service），即係「5S」，仲話ICT業務每年都有超過50%增長，將來會投放更多資源做好佢，聯同各業界一齊推動香港轉型做Smart City。