崇光感謝周年慶開鑼 Le Creuset煲半價 限量必搶

臨近年尾，又係零售業大減價嘅時候，黛安都唔執輸，格定價睇下邊間最抵買。今日係崇光感謝周年慶（SOGO Thankful Week）第一日，Dyson吸塵機同Le Creuset煲都低至半價限量發售，各位姐妹要準備出發啦！

半年一度嘅SOGO Thankful Week，由今日起一連17日喺銅鑼灣同尖沙咀店正式開鑼！減價貨由化粧護膚品、衫、鞋、家品等全部都有，當中第一日限量發售100部嘅Dyson DC 62無綫吸塵機連迷你電動吸頭，原價$5,380，依家減到$2,688，嘩，一定搶崩頭啦，要買仲要喺軒尼詩道新翼門口排隊派籌。搶唔到吸塵機，下星期六都仲有限量50部嘅Dyson Pure Hot+Cool LinkTM三合一風扇暖風空氣清新機，原價$6,480減到$4,588，一樣要喺門口排隊攞籌！

另一必搶之物，一定係Le Creuset煲！公關姐妹話，今次活動低至5折，仲特別重推經典復刻色系Antique Rose，同以往好受歡迎嘅Wasabi琺瑯鑄鐵廚具系列。今日第一日限量出售100套，只要$1,780就可以買佢哋返屋企！下星期一都有Antique Rose花形鑄鐵鍋，折完只係$2,988，好吸引啊！

姐妹提醒，只要喺活動期間去銅鑼灣SOGO嘅10樓Le Creuset專櫃購買任何1件產品就有7折，3件有65折，4件就有6折優惠。