福臨門大廚教整月餅 餅皮要落普洱茶

「富豪飯堂」福臨門唔單止小菜頂呱呱，做月餅都有一手。日前黛安應福臨門太子女Janet（徐淑華）邀請，率先試食今年新月餅，兼觀摩點心部主管根哥（陳維根）整餅。原來福臨門會喺餅皮中加入普洱茶，難怪食件餅、飲杯茶寧舍夾。

原本黛安諗住偷下師，點知師傅三、兩下手勢已將餅皮搓好，連同包餡、印模，全程不到20分鐘就入爐。聽Janet講，雖然佢哋幾年前先開始做月餅零售，但其實以前一直有幫熟客整月餅。師傅亦向黛安透露，大劉（劉鑾雄）都有幫趁買月餅，尤愛低糖口味，就算近年月餅有包裝，佢依舊只用外賣盒包走。

以前搵福臨門做月餅，只有蛋黃蓮蓉味，近年推陳出新，現時有奶皇、海藻糖蓮蓉月餅等選擇，今年仲新推單黃陳皮豆沙月餅，用上天津紅豆和新會陳皮製成，入口甘香，甜而不膩，令人想到福臨門嘅紅豆沙呢！

值得一提係，今年福臨門搵咗名設計師劉小康，以「福」字書法設計出喻意「月滿百福」嘅矜貴月餅盒，買嚟送畀人最適合。