太古糖廠街逛市集 ArtisTree免費睇騷

「糖廠街市集」再度回歸喇！黛安同姐妹傾開發現好消息，太古地產同本地社企Honestly Green將會喺4月22、23、29及30號，喺太古坊舉辦「糖廠街市集」，帶來日本、印度、新加坡、美國、巴西等街頭特色美食，仲會打正旗號採用本地新鮮食材炮製，包括有全港首家使用認證可持續發展魚類製作而成嘅環保魚蛋、市集限定嘅手工啤酒雪條，超過40家創意攤檔，包羅萬有，總有一款牽動大家嘅味覺神經呀！

下周二索取門票

問過太古地產市場推廣總監馮小玲，佢話市集除咗有美食，仲鼓勵大家自攜環保餐具，實踐「零廢」可持續發展生活。順帶一提，「糖廠街市集」將於11月至明年2月以全新面貌回歸，屆時市集會舉行不同主題嘅美食節，每周設特色攤檔售賣肉類、糕點、有機蔬果等，仲有新晉及人氣餐廳帶來獨家限定美食，記得留意官方稍後公布的詳情喇！

開心事又點止咁少吖！黛安八卦到同樣係太古地產旗下、以推動本地藝術文化發展的ArtisTree，今年6月將由康和大廈搬到康橋大廈，仲會舉行4個由本地及國際藝術家製作嘅藝術活動，包括香港編舞家楊春江融合多種不同的藝術形式，製作嘅現代舞、舞獅技巧、懸空藝術，以及意大利歌劇、現代舞劇等，重點係免費畀市民觀賞㗎！下星期二（18號）起可透過Ticketflap（www.ticketflap.com/）拎飛，千祈唔好錯過呀！