祖堯BB將「畢業」 蘇軾古詩贈學生

中大校長沈祖堯素來親民，不少學生都暱稱佢做「祖堯BB」。就快離任的祖堯BB最近就寫網誌，近排成日見到學生戴住四方帽同家人朋友慶祝畢業，令佢諗番起自己為人師表20載，做咗中大校長都快7年，近年最大滿足同挫敗都同學生有關，有好多難忘回憶。

佢自言，除咗替畢業生開心，亦有忐忑同不捨，擔心學生能否應付踏出社會後嘅種種挑戰，趁住自己都就「畢業」引用咗詩人蘇東坡嘅「橫看成嶺側成峯，遠近高低各不同。不識廬山真面目，只緣身在此山中。」勉勵學生，希望佢哋面對爭議時要先了解真相，多角度考慮事情嘅是非黑白。祖堯BB仲用咗《定風波》同《念奴嬌•赤壁懷古》詩詞，希望同學唔好將得失睇得太重，努力面對逆境。