歐鎧淳出水能跑 撑世界地球日

見到靚女飛魚歐鎧淳（Stephanie）除咗諗起佢游水了得，原來佢跑步都唔輸蝕㗎！黛安噚日見到Stephanie出席香港國家地理舉辦嘅國家地理Earth Day Run環保慈善活動，佢話早前同朋友參加過2公里障礙賽，一直都有練開跑，雖然今次第一次「挑戰」3公里，但佢用咗約半小時無難度地順利完成，果然係出色嘅運動員呀！

黛安知道4月22號係世界地球日，所以Earth Day Run來到第二屆，以鼓勵公眾關注剩食問題，減少浪費，保護地球做主題，吸引2,000名來自傳媒、酒店業、個人組同家庭參加。大會為咗加強公眾嘅環保意識，活動期間無派發樽裝水，而參加者嘅T-shirt亦以環保物料製造，籌款幫到惜食堂之餘，又有教育意義，一舉兩得！