美聯40歲 黃建業指揮棒傳下屬

不少分析認為，樓價今年繼續升，相信一班發展商和地產代理最開心。講開又講，本港龍頭代理美聯集團，唔經唔覺做咗40年，黛安日前應美聯集團主席黃建業之邀，出席其周年晚會。

宴會在會展舉行，筵開約200席，黃主席認真有面子，十幾家發展商都有派高層出席。黛安見黃主席在其千金美聯副主席兼副董事總經理黃靜怡（Angela）陪同下，四圍熱情招呼賓客。

當晚黛安聽黃主席講咗好多威水史，原來紮根香港40年的美聯，在業內拎咗多個「第一」，無論上市、實施連鎖經營、行佣金制、電腦化，以至進軍海外，都是第一家，認真犀利！這位老行尊仲大談樓市看法，預料蛇年市況「虎頭蛇尾」，先升後回穩咁話。

一家公司的主席就如樂團的指揮家，不過黃主席可能認為美聯咁大間公司，一個指揮並不足夠，所以當晚特地叫各管理層上台，將指揮棒交畀佢哋，叫大家未來繼續利用美聯的黃金平台做生意喎。

花紅加薪勝舊年

細心一看，入場賓客個個盛裝赴會，原來該晚設有服飾大獎，各區Agent又組隊於台上扮鬼扮馬，唱盡「40年經典金曲」，黛安睇到拍爛手掌。

台上精采，台下一樣好玩，大會為每枱預備一份枱獎，為爭奪獎品，大家都好落力叫出美聯口號，全場亢奮。攞唔到獎都唔緊要，事關黃主席話，今年花紅及人工加幅唔會少過舊年，同事聽到最開心。

各區表演者經過一番龍爭虎鬥，最後由Angela領導的中央團隊部門（CPU）成為大贏家，捧走「最佳團隊合作」及「分區catwalk」大獎，並於Angela手上拎走價值幾萬元的大支票添！