惠康儲印花 換走８款米奇餐具

鍾意米奇嘅朋友仔要注意啦！事關惠康今個月起獨家推出一套8款嘅米奇陶瓷餐具，今次仲玩埋拼圖設計，每款餐具都印有不同嘅米奇特徵，好似招牌圓耳朵、白手套等等，真係好得意啊！黛安都要快點儲齊印花換購先得。

可入微波爐

前兩日去惠康shopping，黛安留意到分店放有小counter，展示米奇餐具實物。8款「米奇夢幻餐具系列」包括24厘米上菜碗、一套兩件嘅27厘米餐碟、20.5厘米小餐碟、水杯、飯碗、湯碗、大湯碗和茶杯連碟。黛安發現呢套餐具唔只可愛，仲幾有型，以純白陶瓷和簡約手繪綫條設計，賞心悅目，用嚟食飯更加開心好味。據介紹，呢套餐具仲可以放入微波爐和洗碗碟機㗎！8件餐具全部可分開換購，不過黛安就覺得碗碟唔怕多，最緊要實用，請多幾個朋友來屋企開Party都仲得。

惠康都好有米奇粉絲嘅心，換購日期足足有4個月咁長，由即日去到8月3日，大家有大把時間慢慢儲印花。現凡喺惠康購物滿60元，就可獲得「笑印」1個，如果係星期六、日購物滿350元，就有雙倍「笑印」，而購買指定「笑印精選」貨品，仲可獲得額外「笑印」。心急嘅朋友仔，只要儲夠20個「笑印」，再加錢就可以換購各款心水米奇餐具啦！