迪士尼西廚揚威國際 特首嘉許

居英的姪女每次返港例必到兩大主題樂園一逛。日前黛安陪她到迪士尼遊玩，於樂園中菜廳晶荷軒用膳時，遇迪士尼傳媒關係總監黃婉筠（Lana），黛安讚點心又靚又好味，Lana叫黛安下次試埋西餐，同樣頂瓜瓜。

Lana話樂園行政西廚麥錦駒，本身是香港廚師協會主席，去年11月他率領14位香港廚師（其中一半屬迪士尼的廚師），到瑞士巴塞爾參加六年一度的世界級廚藝盛事「Salon Culinaire Mondial」，與共十隊全球勁旅比拼，要在五小時內為110人做出三道菜，結果成功在熱食賽中奪得全場總冠軍，真威水！同月迪士尼旗下兩名年輕廚師，與四名廚師組隊到韓國「International Young Chef Challenge」參賽，成功摘下熱食組及擺盤組全場總冠軍，可謂大豐收。

積極培訓新人

聽講特首梁振英今日將到中華廚藝學院嘉許這班為港增光的香港廚師，仲會試食麥師傅團隊的於瑞士得獎的名菜「三文魚蟹餅」等佳餚。

聽Lana講，麥師傅不但廚藝了得，仲好有心培訓新人，早前一班廚師想去芭堤雅代表香港參賽，可惜無錢，他及迪士尼行政總廚Rudolf Muller二話不說，即自掏腰包資助他們拓闊視野。麥師傅話有些後生仔雖然讀書唔叻，學廚卻甚有熱誠，好勤力咁背英文菜名，考取西廚證書，如今於國際大賽揚名，屋企人都好驕傲。