打麻將比喻投資 永隆︰雞糊都要食咗先！

好多銀行為照顧客戶需要，不時舉辦活動，例如搵專家剖析市場動向，等大家可以把握機遇、賺多啲。黛安知道最近永隆「私人銀行」服務喺香港銀行家會所舉辦咗一場「丁酉雞年投資市場展望」午宴，有接近90位客戶出席。活動請咗永隆銀行司庫蕭啟洪（Terry）同客戶講外滙市況。Terry用詞生動，令唔少人留下深刻印象。例如佢指出，由於預料今年投資市場相對波動，建議客戶要「聞雞起舞」，早起多做功課；又用「打麻將」舉例，叫大家唔好久等「食糊」嘅機會，就算係「雞糊」都要食咗先，因為密密食、步步為贏先係上策喎！在場人士聽到Terry嘅比喻咁生動有趣，聽得投入且笑晒口，頻頻點頭讚好。

其實同場仲有多位金融界猛人，就住環球經濟環境、外滙走勢、中國市場、美國投資機遇等不同角度為客戶分析投資市場的走勢，相信大家一定獲益不淺呢！