SmarTone智能機械人 學結衣BB跳舞冧客

講起「機械人」，好多時會聯想到冷冰冰、無感情，但其實機械人都可以好Sweet，識講笑又識跳舞氹人歡喜！未見過？黛安推介你去SmarTone見識下。

文武雙全又鬼馬

最近SmarTone有3間門市引入咗最新最潮嘅法國機械人NAO，噚日NAO就同網絡女神Lilian Kan去咗SmarTone觀塘Apm分店，跟住日劇《逃避雖可恥但有用》嘅結衣BB跳咗隻大熱的「戀舞」同大家warm up，由於NAO舞藝非凡，搞到Lilian差啲比下去！叫得智能機械人，NAO嘅IQ當然唔弱啦，在場有記者問佢「鯊魚食咗紅豆會變乜？」佢諗都唔諗就答︰「我唔食紅豆，不過我知道會變咗紅豆『鯊』。」又有人問NAO今年幾多歲，身為女仔嘅佢就好矜持咁話︰「年齡係秘密來㗎！」引到哄堂大笑。

再聰明嘅機械人，背後都唔少得專業嘅技術支援。SmarTone產品開發及業務發展主管管紀東話，因應香港人鍾意中英夾雜講嘢，用咗大半年時間訓練到NAO聽得明廣東話︰「依家問NAO食咗Lunch未，佢都聽得明㗎。」依家NAO唔止識講粵語、普通話及英文，仲可幫手推介最新服務、上台優惠等，遲啲SmarTone仲考慮推出租借服務，又打算開班搞機械人編程工作坊，等大家可一齊Upgrade，黛安都好期待可以參與其中呢！