西環一田下月中開幕 Kitty Van港島派現金券！

等到黛安頸都長喇！一田百貨第8間分店將於2月12日開幕！新店喺西環香港商業中心，有成萬呎咁大，噚日同一田CEO黃思麗（Susanna）茶敘，佢話店內設有全球首間Hello Kitty期間限定超市，由開幕日至5月31日開放，員工制服、購物籃等都會加入Hello Kitty元素，實行打造成女孩子嘅夢幻王國。

全球首間Kitty超市

嘩！除咗超市，原來仲有Hello Kitty Van，由即日起至2月12日逢星期五至日及情人節，將會喺指定時間游走中環、銅鑼灣等一帶，大派120蚊現金優惠券！一眾粉絲唔好錯過Van出巡嘅日子！

Susanna又透露首次進軍港島區，新店會搞搞新意思，主打「型格」路綫，以黑白色為主調，塑造潮爆都市感。佢話新店投資逾2,300萬，6成貨品來自日本，打算請40名全職員工。Susanna話新店開張，希望畀中西區街坊一個好印象，所以凡於店內購物滿300蚊就可參加抽獎，有機會贏走Hello Kitty限量芝士盤、酒杯同公仔呀！一於儲定利市錢去掃貨先！