水原希子愛訪港 最鍾意食皮蛋粥

香港係國際旅遊美食之都，單係去年就吸引5,000多萬名旅客訪港，對外宣傳香港嘅旅發局絕對功不可沒。

最近黛安同旅發局主席林建岳（Peter）傾開，原來佢哋有新搞作，主題為「Best of all, it's in Hong Kong（盡享‧最香港）」，以時尚、美食、親子遊、大自然景色嘅影片，帶領旅客跟住地道香港人腳步，發掘最道地嘅旅程。

Peter透露，旅發局最近四出宣傳，曾到訪台灣、首爾、北京同曼谷，同當地傳媒介紹香港最新品牌概念，香港四季酒店中菜行政主廚陳恩德、著名酒評家李志延、本地美食旅遊達人紀曉華，同地星級廚師楊尚友都有幫手為宣傳出一分力，認真唔話得呀！

而最新一站宣傳活動，噚日新鮮熱辣喺日本東京舉行，Peter邀請到熱愛香港、擁有逾400萬IG粉絲嘅日本人氣女星水原希子，同埋日本著名壽司老店久兵衛、第二代店主兼主廚今田洋輔出馬做宣傳。原來水原希子鍾意香港，大讚香港除咗喺一個中西薈萃嘅城市，佢話每次走到街頭小巷總會有新發現，去完時裝店掃貨，又會去食番碗皮蛋粥先走。而今田洋輔就話，香港最有吸引力之處，係集合咗全球美食，嚟玩之餘，仲可以搵創作壽司靈感，真係一舉兩得！