陳南祿「好繩」 贈同事

旅行，往往令人留唔少難忘回憶。恒隆租務及物業管理高級經理羅欣琪（Katherine）唔例外，黛安早幾日同佢喺Fashion Walk食lunch，佢話上個月去新西蘭旅行，仲share咗好多靚相畀黛安睇，藍天白雲，青山綠水，齋睇都覺得身心舒暢。佢話去新西蘭一定要慢慢玩，用一日釣魚、一日騎馬，隻馬仲孭住佢行過河，河水浸到馬肚咁高，聽落好刺激！

萬花筒聖誕樹 夠夢幻

Katherine旅行咁健康，原來係佢哋公司文化，佢話上個月秋風起，成班管理層即刻化身健康大使，一齊去旗下多個物業送滋補飲品畀同事，董事總經理陳南祿、董事（租務及銷售）陳家岳都有落手落腳派埋一份！除咗送滋潤飲品，管理層仲送咗條健身繩畀同事，等大家可做多啲運動，唔知係咪暗示緊啲同事「好醒」呢？

講開Fashion Walk，11月已好有聖誕氣氛，Katherine話成條百德新街擺咗9棵聖誕樹，商場內嘅一棵仲有成4米高，係日本空間藝術家白根昌同KAZ SHIRANE嘅最新作品，聖誕樹用咗270片三角形不鏽鋼反光物料製作而成。聖誕樹仲內有乾坤，入面由多塊鏡面組成，行入去就好似去咗萬花筒入面咁夢幻！