新地垂直跑下月舉行 黃植榮積極備戰

所謂日日運動身體好，為咗備戰一年一度、將於12月4日舉行嘅「新地公益垂直跑——勇闖香港ICC」，昨日主辦單位新地約咗黛安同一班傳媒好友，齊齊換上運動裝，由R3防火層跑21層樓梯上到100樓「天際100」觀景台。聽同場參與嘅香港半馬紀錄保持者紀嘉文講，跑樓梯唔單止人都健康啲，仲可鍛練腿部肌肉，令身體綫條更靚，聽完之後黛安梗係落足力跑啦！

去年25分鐘登頂

不過黛安所跑路段只係「輕量版」，因為垂直跑嘅重點賽事係由8樓跑到100樓，到時選手將會征服2,120級樓梯，跑上「天際100」睇風景！舊年賽事雲集新地高層，包括新地主席兼董事總經理郭炳聯、執董郭基煇（Adam）、黃植榮（Mike）及雷霆等都身體力行參賽。

平時有練開長跑、身形fit爆嘅Mike昨日都有來，佢同黛安講舊年用咗25分鐘登頂，今年係佢第3年參加，但無刻意定下目標時間，只希望enjoy過程，不過近日佢已經積極練習。

同場仲有上屆個人賽男子組冠軍、年僅18歲嘅「垂直跑界小鮮肉」楊鎧駿。佢就巴閉啦，自從上年贏咗比賽後，新地資助佢去巴黎、悉尼參加國際垂直跑賽事，成績仲唔錯，年紀輕輕就揚威海外，勁呀！