蒙德揚教用麵包機整豬肉鬆

每年一度嘅「樂聲盃」上周六於沙田馬場舉行，代理商信興集團特意在馬會廂房設宴，盛事既可與一班一眾政商界名人聚舊，又可以品嘗一下信興老闆蒙德揚（David）家傳秘方炮製嘅蒙氏咖喱，更可以用優惠價買到樂聲牌新出品電器。

秘訣先放雪櫃 抽乾水份

每年樂聲盃，David都會用佢代理嘅電器即席為來賓炮製美食，今年佢就整咗香噴噴嘅豬肉鬆畀大家歎。大家食過都舔舔脷，爭住想食多啲。黛安梗係要八下究竟用咩神器整啦！唔講唔知，原來啲豬肉鬆係用部麵包機整，材料係用煲過湯嘅豬肉整出黎，估唔到湯渣放入麵包機一陣就可變佳餚，咁以後黛安咪可以用媽咪煲完湯嘅肉，喺屋企撳個掣就有得食？無咁簡單！因為黛安漏咗一最重要嘅步驟。原來要煮得好食有秘訣，就係要將煲湯豬肉先放入雪櫃，等佢抽一抽乾水份，咁樣整出嚟嘅豬肉鬆更加乾身好味。

當日活動政商雲集，黛安不但見到中大校長沈祖堯、資深傳媒人魏綺珊、前廣播處處長張敏儀、中電企業發展總裁莊偉茵、浸大新聞系首席講師馮強（Victor）等，Victor大讚以蒙氏咖喱製成嘅豬肉鬆別有一番風味，唔識玩馬仔嘅Victor更加喺其中一場買咗有「Victor」呢個名嘅馬碰下運氣，大家都玩得好開心。