荔枝角秋季市集 搜羅郊遊用品

秋高氣爽，最啱去野餐同露營，荔枝角D2 Place今個周末會舉行無名市集Ever Market，今次主題咁啱就係「秋末遊記」，有成百間本地商戶參展，主要售賣野餐、露營及其他戶外用品、手作工藝品、環保及天然產品、異國特色工藝品等，準備去秋遊的話，不妨去睇下有無心頭好。

無名市集一向都支持本土小店同設計師，今次市集請到本土手作達人同大家一齊探索最新最型戶外用品。大會仲會喺天台花園舉辦露營體驗區，擺放各式各樣戶外用品免費試用，最令人期待係會有個草坪地帶，將個天台打造成高空綠洲，旁邊更有特色小食攤檔，真係好似喺高空綠洲野餐咁！