$2688洲際吃龍蝦鮑魚

旅發局緊接上月底結束嘅美酒佳餚節，又發動另一波美食攻勢！上星期四至下星期日（13/11）一連11日，邀請咗20間米芝蓮星級餐廳參加「臻味品鑑週」（Elite Dining Week），由頂級名廚設計特色菜單，饕客認真有口福！

昨日黛安就有幸品嘗香港洲際酒店星級餐廳欣圖軒特別設計嘅「大紅柑普洱茶尊皇宴」，一共有8道菜式，包括椒鹽龍蝦伴化皮乳豬件、紅燒官燕斑柳卷、蠔皇廿八頭吉品鮑伴關東遼參、鹽燒舞菌石鍋和牛、泰國龍眼珍珠伴薑味雪糕等。主廚劉耀輝話食材矜貴新鮮，甜品更是和酒店法國糕點師一同設計，中西合璧，所以別樹一格。

2010年普洱 釀入新會柑

茶品通常被認為是美食嘅附屬品，但欣圖軒呢個「大紅柑普洱茶」絕對會改變你嘅想法。資深茶藝師吳志泉話，不同年份嘅紅酒，口感都有唔同，茶葉亦講究年份，該茶品嘅茶葉係2010年曬成，釀入2012年收成、曬乾嘅新會紅皮柑內，認真香氣馥郁，口感甘甜。