37名牌聯手「Style Up」 海港城BE@RBRICK展

收到海港城公關姊妹寄嚟至潮BE@RBRICK限量版雨遮，個個都大讚設計好型仔，拎住行出街，就算落雨天心情都靚晒！姊妹話，9月19日海港城有場時裝盛會，係品牌2007年後再次同潮流icon「BE@RBRICK」合作，邀請37個頂尖時裝名牌參與，打造最大型時尚藝術聯展--「Style Up BE@RBRICK」。

日本玩具品牌Medicom Toy出品嘅BE@RBRICK熊仔，一向係潮人至愛，今次37個潮牌嘅設計師，會分別為37個1.4米高嘅「2000％BE@RBRICK」做「Style Up」，當中部分係特登設計一套衫；亦有設計師構思獨特pattern畫或者印上展品。「2000％」係玩具熊咁多種尺寸中，一般都無得買嘅「展品size」之一。今次展覽之後，37個「Style Up BE@RBRICK」會慈善義賣為「香港血癌基金」籌款，係咪好有收藏價值先？

海港城為咗隆重其事，展覽前特別推出BE@RBRICK「Style Up in the Rain！」限量版雨傘及小童雨靴。佢哋仲搵埋著名攝影師沈平林拍攝一輯雨中時裝照，等一眾潮流達人率先感受2016秋冬時尚氣氛。