銅鑼灣Kyoku 歎時令刺身＋鐵板燒

料理師傅對食材嘅認真係日本料理吸引人之處。公關姊妹約食飯，話一齊試下今年年初銅鑼灣希雲街開店嘅日本餐廳「Kyoku旭」，未開始視綫同嗅覺已被枱頭一碟醃子薑吸引。人稱「偉師傅」嘅主廚陳文偉話，餐廳配菜都選用嚟自日本嘅日式子薑，每年3、4月先有出品，再用自家調製嘅醋醃製，未開餐已食咗幾塊，非常開胃。

講番「正餐」，Kyoku主打壽司刺身同鐵板燒，今次石垣貝同海膽壽司都有驚喜。偉師傅話餐廳用最時令食材，好似石垣貝就唔係時時有。大家留意到壽司上碟前佢會用手輕輕一拍，原來係要「刺激」塊石垣貝，食落更有口感。睇住佢一邊準備，一邊講解食材同製作蹺妙，食都食得開心啲！

除咗壽司料理，當然要試下餐廳嘅鐵板料理，海膽豆腐同海膽炒飯兩個煮法，前者用煎香豆腐襯托海膽，後者將海膽香味加入炒飯；愛好海膽呢款食材絕對要試下。