迪士尼新CEO首見傳媒

香港迪士尼樂園度假區行政總裁劉永基（Samuel）噚日出席活動，係接替前任CEO金民豪後首次正式見傳媒，履新約一個月，聽聞Samuel勤力之餘好nice，上任以來，密密見唔同部門，務求盡快熟習運作。噚日大家問起感受，佢提到好開心之餘，仲話迪士尼紮根香港十年，累積唔少經驗，未來亦會推出好多新設施，好有信心應對挑戰。

講起上海迪士尼6月開幕，Samuel明言唔擔心競爭，又用美國都有兩個迪士尼樂園為例，話香港同上海兩個樂園客路唔同，相信可以一齊發展。

提起即將落成嘅新景點，大家都關注啟用時間，Samuel提到分享，好似由機動遊戲「飛越太空山」upgrade而成、以星球大戰做背景的「Hyperspace Mountain」6月推出；迪士尼小熊Duffy主題商店暑假同大家見面；仲有全球獨有以香港做背景「鐵甲奇俠」項目年底開幕。嚟緊有咁多吸引景點，難怪佢話有信心吸引遊客慕名而來，仲話收支平衡係「遲早問題」。

講番噚日活動，其實係家校會舉辦「伴你高飛」獎勵計劃，嘉許全港有傑出進步、身體有障礙的學童，政務司司長林鄭月娥都有出席，一齊頒嘉許證書表揚計劃得獎學童、家長同教職員。林鄭話，活動旨在凝聚社會各界力量，共同喺香港傳播正能量，又鼓勵大家要有欣賞的心，感激社會上每個默默地以自己力量貢獻社會、建設香港的成員。