任國際評審 勉港生放眼世界 沈祖堯自嘲「很渺小」

香港中文大學校長沈祖堯網誌分享去日內瓦擔任國際獎項評審嘅體驗，感慨地話，香港有技術、學生有能力，如可以放眼一己以外世界，思考如何發揮更大影響力，亦可造福人群。沈校長話，候選人有個共通點，大部分人都受過大學教育，離開自己熟悉嘅行業或國家，只為實現夢想、改變世界。

好似其中一位眼科醫生，研發可拍低眼睛內部結構、裝在智能手機嘅簡單攝影機後，無諗過用發明賺大錢、放棄喺倫敦做醫生，去到肯尼亞成立眼科診所，用發明診斷白內障、糖尿、寄生蟲感染等能引致失明常見毛病，醫治年老病人、幫千千萬萬兒童預防失明。

另一位中國農村移居美國嘅女子，雖獲哈佛商學院取錄，但佢無去哈佛上堂，反而跑去陝西省農村。夢想係證明改變行為就可改變社會嘅佢，換上農婦裝、花一年時間教育婦女點樣避免污染河流、防止土壤受化學品同人類排洩物污染。

每個故事都有發人深省之處，唔怪得沈校長話「兩天過去了，我覺得自己很渺小。」其實無論職業、學歷係點，只要有心，總能為世界出一分力，好似沈校長引用霍金的話，「無論生活有多艱難，總有一些你能做和做得來的事。」