凱悅酒店主廚出馬 幫國泰炮製全新飛機餐

噚日獲邀出席試菜，大廚親身示範拿手菜，大廚埋位前望住材料估估下，有蛋黃、綠豆等等，心諗「端午節就到，仲唔係包糭」，點知唔係糭而係意大利傳統菜！呢道菜係香港君悅酒店餐廳Grissini主廚Alessandro出品，近睇先知唔係綠豆係薯蓉。Alessandro話，上到飛機都keep到水準，大家食完會想去Grissini試埋餐廳其他出品！

今次係國泰、港龍航空同凱悅酒店集團合作，由凱悅旗下唔同酒店大廚為兩間航空公司設計頭等同商務客位飛機餐菜式，新菜單今個月到下年年中陸續登場，月月有新滋味，國泰仲首次有鮑魚菜式，頭等艙乘客中式冷盤有四個選擇，包括花雕酒醉鮑魚。國泰兼港龍餐務部主管卡斯頓講起，品牌首次同知名酒店集團全球推新菜單，期望可以提升顧客飛行體驗。凱悅亞太區酒店項目及餐飲服務副總裁沈達德都話，每年唔少時間做「空中飛人」，成日搭飛機，明白食物質素重要性，希望新菜式帶嚟難忘體驗。

講番新菜，國泰同港龍菜式分別由香港君悅酒店港灣壹號同Grissini打頭陣，港灣壹號總廚李樹添笑說花咗唔少心思，「鮑魚整冷盤係新嘗試，另外炆牛腩特登揀牛面珠，膠質多啲，上飛機翻熱仍然好味。」添師傅仲透露整芒果布甸秘訣，「因為有筋唔可以一刀切芒果肉，要批皮後慢慢刮啲肉出嚟。」