詠藜園健康月餅 80％收入捐慈善團體

詠藜園有活動都唔想錯過，因為負責人楊太（楊王小玲，圖中）每次分享善心計劃，都令人感動非常。除咗每年將詠藜園四川擔擔麵收益，透過家姑名義成立嘅詠藜園陳鳳英慈善基金捐助唔同機構，自2012年起推出「善同行」慈善月餅都係重頭戲之一。

以御膳秘方製成嘅月餅，目的唔係賺錢，而係捐助慈善團體，詠藜園扣除成本後會捐出80％月餅收入；過去4年，捐款額超過$350萬。楊太強調，月餅有3點獨特之處，就係「唔用豬油同鹹蛋黃」、「用成本較高但更健康的海藻糖」、同埋「用純果仁」，好味得嚟夠健康。

今年除咗固定受惠機構榕光社同香港失明人互聯會，仲會捐助幫助聽障人士及家屬嘅龍耳，為年長的聽障人士提供助聽器。楊太話，慈善月餅計劃係愛心嘅延續，唔止係單一次捐款，「透過活動等多啲人認識受惠機構，知道佢哋點樣服務有需要人士，等更多人去支持佢哋。」

活動上見到唔同受惠機構代表，包括龍耳（聽障）服務中心副主席鄧肇中、榕光社主席聶揚聲、香港失明人互聯會主席鄧光寶等。鄧肇中講起，本港合資格手語傳繹員太少，期望未來有更多資源培訓合資格。