ViuTV啟播禮 Eason壓軸 叫大家開電視 撳99台

「與其留喺comfort zone，不如行入八角籠」，呢句ViuTV真人Show《G1格鬥會》主題曲《硬仗》嘅歌詞，講緊幾位參賽女藝人心聲，感覺同呢個新免費電視台好襯。慣性收視持續多年，好多人都認為「愈嚟愈少人睇電視㗎啦、免費電視係咁上下」。直至ViuTV加入「八角籠」，最近開始有其他聲音，好似做電視製作的老友都話：「感覺打仗年代返嚟」，字裏行間透露大家好期待競爭。

魯庭暉：百花齊放先好

學ViuTV總經理魯庭暉（Lofai）話齋，「做大個餅，百花齊放先好」，有競爭先有進步。噚日ViuTV正式開台，喺灣仔會展舉行啟播禮，政商界、演藝界、廣告界好多人都去撑場，陣容鼎盛。財爺曾俊華仲同Lofai一齊做主禮嘉實，傳媒朋友對財爺致辭時講「對的開台時間」好有興趣，猛咁追問Lofai點睇，佢就笑笑口話，財爺問佢「今日場地係咪好貴」，佢就答「物超所值」。

講番啟播禮，嘉賓輪流上台表演，有人用歌聲、有人孖住talk番幾句，帶出ViuTV節目內容。唔可以唔提陳奕迅（Eason）壓軸出場，唱《今天只做一件事》，心諗點解唱呢首歌呢？Eason唱完之後就話：「今天只做一件事，開電視，撳99，過有選擇嘅生活」，Eason都咁講，大家識做啦！