曲奇薈K11開旗艦店 食住曲奇飲伯爵茶

收到「曲奇大王」黃志煒（Joseph）消息，曲奇薈有新發展，認真可喜可賀。噚日黛安去曲奇薈尖沙咀K11旗艦店，一睇就知肯定唔只賣曲奇咁簡單。入門口左面係櫃位，右面陳列架除咗禮盒，仲有茶壺茶杯，唔通係賣茶？Joseph同黛安講，機緣巧合在K11開店，期望是蛻變機會，更說：「K11特點之一是有藝術氣氛，曲奇薈係呢度唔想淨係賣曲奇。大家行入嚟，可以試塊餅、飲杯茶；未來仲希望舉辦講座，例如搵紅茶大師教品茶等。」

對產品有要求，店內品嘗嘅點會係普通茶？Joseph笑住話，「鎮店之寶」包括以茶為主題嘅曲奇系列，除咗《茶薈》，仲有去年新推出有六款口味嘅《伯爵‧藍夫人曲奇》。佢嘅同事話，揀茶葉花咗唔少時間，包括選用意大利茶葉，「曲奇製成後，入口嘅茶味同用熱水沖泡比較，相對較淡；所以都想大家品嘗茶味曲奇之餘，飲到我哋用嚟做曲奇嘅茶。