一個蘋果賣$700？ 皆因背後有魔法

童話故事《白雪公主》中，公主食過巫婆嘅蘋果後就昏迷，直至得到心愛王子一吻先醒得番，所以毒蘋果又被視為不詳之物。不過，日本有店舖居然以「毒蘋果」為概念，推出情人節產品！

發售「毒蘋果」嘅係一家魔法店，店主之所以叫佢做「毒」蘋果，全因呢款果實嘅皮呈深黑色。原來呢款蘋果產自山形縣「出羽三山」山腳一個果園，據悉該區域位處三座神山之間，向來被指有「仙氣」，因此生長於該處嘅蘋果亦被指具有神秘魔力，可以幫你認識白馬王子，或者祈求婚姻美滿等等。

根據說明書，用家只要將蘋果洗乾淨，再將願望刻上去，畀心愛對象或者自己食用，就可願望成真。但呢個愛情魔咒價錢唔平，每個盛惠10,800日圓（約710港元），比普通蘋果貴近百倍！其實蘋果嘅成本可能好平，值錢嘅係背後故事。