旅發局同事好打得

日前同旅發局主席岳少（林建岳）及總幹事Anthony（劉鎮漢）食飯，唔講唔知，原來旅發局同事「好打得」，以傳訊組為例，全Team得10個同事，但舊年全年接待咗超過420家海外傳媒嚟香港採訪拍攝，平均每日都有記者嚟，真係忙到無時停！

黛安聽佢哋講，有時係外國媒體主動搵旅發局帶路，有時調番轉，由旅發局同事獻計請傳媒來港，所以佢哋唔單止要熟悉香港地標同景點，仲要好有潮流觸覺，知道全球各地流行睇咩節目，咩路綫適合佢哋拍攝，十足十電視台製作組一樣。

長途旅客愛行山

譬如早前韓國人氣料理節目《拜託冰箱》開拍海外版，就搵咗Super Junior M成員Henry及華哥（任達華）一同拍攝；另外佢哋仲幫英國節目《This Morning》，為著名港英混血時裝設計師Gok Wan籌備香港尋根之旅；又帶過台灣歌手盧廣仲到深水埗捐窿捐罅作深度遊。聽講之前有位韓國記者介紹完一條遊港路綫，有旅行社主動接觸記者，話想以佢報道嘅路綫開辦旅行團，團費位位兩萬蚊，證明香港旅遊資訊喺外地係有市場、有需求。

講起綠色旅遊，旅發局話唔少長途旅客都愛來港行山，覺得香港山景變化大，行大半個鐘，眼前景色就由市景變山景，甚至海景，南港島區龍脊更是旅客首選路綫。