港鐵站內開Party 馬時亨帶私伙酒宴客

黛安去過好多Party，不過星期六晚去嗰個，就令黛安非常難忘，事關宴會喺港鐵站入面舉行！

話說南港島綫年底通車，港鐵主席馬時亨星期六晚特登請一班傳媒好友，喺南港島綫海洋公園站內食BBQ大餐。馬Sir仲好唔話得，自攜私伙美酒宴請嘉賓。據講支酒係佢2014年喺民主黨晚宴競投番嚟。佢自爆，2013年喺同一活動拍賣咗一幅畫回家，事後發現係假貨要退款；所以佢話，如果大家飲完發覺支酒有問題，都會向民主黨追討退款。但佢當然係講笑啦！事關馬Sir事前已身先士卒，試過批酒係靚嘢先攞出嚟宴客。

當晚大家玩得好盡興，並七嘴八舌向馬Sir提議日後多啲善用港鐵站，譬如好似當日咁開Party、搞婚禮；又或者喺南港綫未啟用前，將港鐵站借畀學校、社企畢業禮或合唱團等。未知意見有無機會被採納呢？

除咗介紹港鐵新發展，馬Sir不忘稱讚一班好同事，仲用3個「-tion」去形容佢哋對公司嘅貢獻：佢話港鐵CEO梁國權對工作夠晒dedication（熱誠），而商務總監楊美珍及各部門同事則負責execution（執行），港鐵服務先能夠function得到。又講得幾貼切喎！