麥當勞旗艦店戶外樂園 聽星媽講故事

上星期提過，麥當勞太和店重新裝修後，變身家庭式旗艦店，噚日黛安終於有機會「朝聖」一下。平房式設計走綠色環保風，餐廳三面換上落地玻璃，非常光猛。最特別的是，分店首次設有育嬰室，仲有面積約6,000呎的戶外PlayPlace樂園，同「友善」措施。

為隆重其事，麥當勞香港董事總經理黎韋詩（Randy）都親自出席剪綵，同場支持仲有聯合國兒童基金會香港委員會委員梁平、領展CEO王國龍（George）同出爐金馬獎影后林嘉欣（Karena）。

黛安一行入PlayPlace樂園，就聽到小朋友笑聲，原來Karena發揮星級媽咪本色，同大家講故事！小朋友踴躍答問題，仲好熱情咁嗌「嘉欣姐姐」，Karena開心甜笑之餘，忍唔住話，「我已經係嘉欣媽媽啦」，跟住仲同小朋友介紹，故事書兩位小主角，係佢嘅兩位寶貝女Kayla同Sophie，唔怪Karena一路講一路甜笑。

講番旗艦店，Randy話，唔經唔覺麥當勞服務香港40年，未來希望繼續為大家營造更多「Happy Family Moments」。黛安又聽麥當勞企業傳訊高級總監林婉梅（Wendy）講，除咗太和分店，仲有19間分店推出母乳餵哺優先座，為一眾媽媽提供良好環境。