商場過聖誕 節目豐富

聖誕節到喇！大家準備節目慶祝未呢？黛安有好介紹呀。噚日去咗MegaBox見證一個亞洲紀錄的誕生，商場即日至元旦日以萬千氣球做主題，世界氣球大賽冠軍彭思泰用1.8萬個氣球，以31小時打造出最大直徑8米嘅空中聖誕花環，放喺溜冰場上空，成功獲亞洲紀錄大全「Asia Book of Records」代表頒發證書，真犀利呀！

送海洋公園門票

溜完冰記住唔好錯過，喺拆禮物日（26日）舉辦的聖誕雪人氣球親子工作坊，由彭思泰開班授徒；再玩埋fb專頁的數波波大抽獎，有機會贏走海洋公園門票、溜冰禮品等100份驚喜禮物！

行過九龍灣又夾啱時間，可以去德福廣場，公關姊妹同黛安講，曾在電視節目中以魔法示範極速換裝的John Fung，將會喺聖誕節當日下午再次獻技，大搞魔法派對，送上Rock版聖詩！

住港島區嘅朋友都有好去處，銅鑼灣皇室堡會喺平安夜下午，舉行卡通人物梳乎蛋音樂派對。黛安仲知道中環海濱的香港摩天輪聖誕期間會延長開放，平安夜開到凌晨2點，聖誕當日同Boxing day就開到12點。咁多節目，黛安要好好分配時間至得啦！