麥當勞兩餐廳職員 獲頒全球大獎

加入麥當勞呢個大家庭多年，香港區餐廳總經理Garvin同Andy，今年獲頒以麥當勞創辦人Ray Kroc命名嘅「Ray Kroc Award」，每年全球超過36,000間餐廳入面，只有百分之一最頂尖餐廳總經理有機會得到殊榮。從佢哋開心嘅聲綫聽得出，獎項唔單止係一種肯定，更係繼續努力嘅動力。

兩個人不約而同講起，入職最初唔肯定自己嘅目標，但係工作期間發現有唔同機會。好似Garvin，加入麥當勞時係副學士畢業，工作一段時間發現需要更高學歷，好在工作時間有彈性，令佢有機會一邊進修一邊工作。

待客或同事 均以人為本

至於Andy，回想96年由暑期工做起，佢話好體會到公司「以人為本」嘅文化，無論係對同事或者顧客，都好有人情味。負責機場分店嘅佢分享，工作上常遇見趕時間或心情唔好嘅客人，「客人點餐時無講飲咩，同事一般安排汽水，結果客人要求見經理，靜靜聽佢鬧咗半個鐘後，發現客人當日遇上好唔開心嘅事，因為有人聽佢傾訴，結果舒服番。」

做主管除咗要處理顧客層面溝通，同前綫同事嘅配合都好重要，Garvin話初升職試過同下屬相處用錯方法，例如「唔可以假設佢哋咩都識」，後來得上司教導，逐漸掌握同年輕員工溝通技巧。