踢走負能量

近期好多人都讚佘詩曼喺《新聞女王》內氣塲懾人，而Rain喺《亞洲超星團》亦係非同凡響，佢只係坐喺度做評判，氣場足以震懾全場。另一位係林青霞姐姐，我隔住部手機睇第60屆《金馬獎》頒奬典禮，睇林青霞姐姐榮獲「終身成就獎」時，着住一襲紅色斗篷禮服，扣上鑽石胸針並戴上紅寶石鑽石耳環與戒指，佢站在台上，優雅中散發佢非凡嘅氣勢，厲害！以上係其中呢期氣場磅礡嘅代表人物，仲有好多你認識或唔認識嘅人，佢哋嗰種氣場無色無味，點解你都知佢氣場大呢？

一個有氣場嘅人，唔需要「咄咄逼人、恃強凌弱」，反而佢哋比任何人都謙卑，皆因佢哋內心已經好強大，佢哋出現，就算唔開口說話，從容自由嘅姿態，就已經散發出嗰股隱形能量，令人感到嗰股氣場！通常一個人氣質好，外表精神，有修養，有道德，呢個人嘅氣場必定好；有好氣場嘅人多數會吸引好嘅事、好嘅運氣。
 
相反一個人如果氣場唔好，則外表無精神，萎靡不振，做事冇效率，氣場再壞啲可能連帶自己啲運氣都霉啲⋯⋯嘩！我一定想自己有好運伴隨住啦，因此意念絕對會影響我哋氣場。

你想甚麼，你相信甚麼？你就有乜嘢嘅氣場，呢啲就係吸引力嘅法則，已經有好多證據顯示係真。當你充滿積極向上嘅思想，你嘅氣場就係積極向上的，你嘅思想係消極負面，你嘅氣場就會係消極負面的，亦會同時吸引消極負面嘅人和事，所以要加強你嘅正能量磁場，就要有積極正面嘅思想。

正能量係：活力、精力充沛、興奮、熱情、全神貫注、多姿多采、正面挑戰、內外合一、自我提升、提升他人、淡定、擔當、冷靜、平靜、寧靜、放鬆、煥然一新、和諧等。負面能量係：憤怒、懷疑、沮喪、擔憂、急躁、壓力、負面的挑戰，所有的事情都是問題；關係是挑戰…怨恨、後悔、內疚、嫉妒、自卑、絕望、挫敗、羞恥、尷尬、責怪。

想自己有好氣場好運氣，從今日開始，就要凝聚多啲正能量，踢走負能量了。

（本欄逢星期四刊登）